ՄԻԱՎ-ի կանխարգելում Հայաստանի Հանրապետության 15-24 տարեկան երիտասարդների շրջանում - 2009

Սկսած 2009թ.-ից «ՁԻԱՀ-ի կանխարգելում, կրթություն և խնամք» հասարակական կազմակերպությունը ՄԻԱՎ-ի կանխարգելման ծրագիր է իրականացնում Հայաստանի Հանրապետության 15-24 տարեկան երիտասարդների շրջանում` ընդարձակելով կանխարգելման աշխատանքների շրջանակը կրթական հաստատություններում և բանակում: ՄԻԱՎ/ՁԻԱՀ-ի կանխարգելման աշխատանքները կրթական ու ռազմական հաստատություններում կատարվում են «Հավասարը` հավասարին» մեթոդով ուսուցման միջոցով:

Ծրագրի շրջանակներում անցկացվող միջոցառումների ընթացքում, ամեն տարի նախատեսվում է գիտելիքներ տրամադրել 15-24 տարեկան 160 000 տղաների ու աղջիկների, այդ թվում 40 000 զինծառայողների: Արդյունքում հնարավոր կդառնա անհամեմատ բարձրացնել ՄԻԱՎ/ՁԻԱՀ-ի փոխանցման ուղիների և կանխարգելման մասին գիտելիքների մակարդակը երիտասարդության շրջանում: Ծրագրի շրջանակներում կանցկացվեն սեմինարներ մարզային մակարդակով` կրթական և ռազմական ոլորտի ներկայացուցիչների, ինչպես նաև մարզային ղեկավարության ներկայացուցիչների մասնակցությամբ: Դրանց ընթացքում քննարկման հիմնական թեմաները լինելու են ՄԻԱՎ-ի կանխարգելման, դպրոցներում ու բանակում «Հավասարը` հավասարին» մեթոդով ուսուցման ծրագրերի առաջնահերթությունը, կամավոր խորհրդատվության ու հետազոտության տրամադրումը:

Ծրագիրը նախատեսում է համայնքների ակտիվ ներգրավվածություն ծրագրի միջոցառումներում, քանի որ այն ուղղված է համայնքների ներկայացուցիչներին` դպրոցի տնօրեններին, կազմակերպիչներին, ուսուցիչներին, ինչպես նաև ծնողներին և ծրագրի անմիջական շահառուներին` երիտասարդներին: «Հավասարը` հավասարին» մեթոդով կրթողները կփոխանցեն իրենց գիտելիքները ոչ միայն իրենց դասընկերներին, այլ նաև իրենց հասակակիցներին, հարևաններին և բարեկամներին: Այս կերպ համայնքը կներգրավվի «Հավասարը` հավասարին» մեթոդով ուսուցման մեջ և կդառնա երիտասարդների շրջանում ՄԻԱՎ-ի կանխարգելման միջոցառումների անմիջական մասնակիցը: 

Ծրագրի շրջանակներում զինված ուժերի ներկայացուցիչների հետ կազմակերպվելու են հանդիպումներ, որոնց ընթացքում ընդգծվելու է «Հավասարը` հավասարին» մեթոդով ուսուցման միջոցով ՄԻԱՎ վարակի կանխարգելման խնդրի կարևորությունը, տրամադրվելու են ՄԻԱՎ/ՁԻԱՀ-ի վերաբերյալ տեղեկատվական նյութեր ու պահպանակներ:

«Հավասարը` հավասարին» մեթոդով ուսուցման միջոցառումների արդյունքում տեղեկատվություն կստանա ուսումնական հաստատություններում սովորող 120 000 երիտասարդ: Ընդհանուր առմամբ, «Հավասարը` հավասարին» մեթոդով ուսուցման միջոցառումների արդյունքում ամեն տարի տեղեկատվություն կստանա 160 000 երիտասարդ: Ծրագրի արդյունավետ իրականացման համար «ՁԻԱՀ-ի կանխարգելում, կրթություն և խնամք» ՀԿ-ն սերտ համագործակցում է ՀՀ Կրթության և Գիտության Նախարարության և Պաշտպանության Նախարարության, ինչպես նաև «Գորիսի ուսուցիչների միություն» ՀԿ-ի և «Երիտասարդական Մշակութային կազմակերպություն» ՀԿ-ի հետ: Եվ նախարարությունների և հասարակական կազմակերպությունների ներկայացուցիչները պարտավորվում են կապ պահպանել այս կառույցների հետ:

22 Հունիս, 2010